میچ بائیکاٹ کے معاملے پر آئی سی سی سے رابطہ نہیں کیا، پی سی بی نے بھارتی میڈیاکادعویٰ مستردکردیا

پاکستان کرکٹ بورڈ نے ٹی ٹوئنٹی ورلڈکپ میں بھارت کے خلاف میچ کے بائیکاٹ کے حوالے سے بھارتی میڈیا کے دعوے مستردکردیئے۔بھارتی میڈیاکی جانب سے مبینہ طور پر دعویٰ کیاگیاتھاکہ بھارت کے خلاف میچ نہ کھیلنے کے معاملے پر پاکستان کرکٹ بورڈ نے انٹرنیشنل کرکٹ کونسل سے رابطہ کیا ہے۔

پی سی بی کے ترجمان عامرمیرکاکہناہےکہ  بھارتی میڈیا جھوٹ پر مبنی دعوے کر رہا ہے، وقت بتائے گا کہ کس نے کس کا دروازہ کھٹکھٹایا۔ ہم بھارتی اسپورٹس جرنلسٹ وکرانت گپتا کے اس دعوے کو قطعی طور پر مسترد کرتے ہیں کہ  ٹی ٹوئنٹی ورلڈکپ میں بھارت کے خلاف میچ نہ کھیلنے کے معاملے پر پی سی بی نے آئی سی سی سے رجوع کیا۔

ترجمان پی سی بی کے مطابق بھارتی میڈیا کے کچھ حلقے من گھڑت کہانیاں پھیلانے میں مصروف ہیں۔ تھوڑا سا صبر اور وقت سب کچھ واضح کر دے گا کہ دروازہ کھٹکھٹانے کون گیا تھا اور کون نہیں۔