محسن نقوی کی دبئی میں ورلڈ گورنمنٹس سمٹ میں شرکت، ہم منصب سے ملاقاتیں

دبئی / روانڈا: وفاقی وزیر داخلہ محسن نقوی نے دبئی میں منعقدہ ورلڈ گورنمنٹس سمٹ میں شرکت کی، جہاں دنیا بھر کے رہنماؤں اور بین الاقوامی ماہرین نے شرکت کی۔

سمٹ کے دوران محسن نقوی نے متحدہ عرب امارات کے نائب وزیر اعظم و وزیر داخلہ لیفٹیننٹ جنرل شیخ سیف بن زید النہیان اور روانڈا کے وزیر داخلہ ڈاکٹر ونسنٹ بیروٹا سے اہم ملاقاتیں کیں۔

ملاقاتوں میں پاک-یو اے ای اور پاک-روانڈا تعلقات کو مزید مستحکم بنانے، سکیورٹی تعاون بڑھانے اور دہشت گردی و اس کی مالی معاونت کی روک تھام کے لیے مشترکہ حکمت عملی مرتب کرنے پر اتفاق کیا گیا۔

وفاقی وزیر داخلہ نے کہا کہ یو اے ای کے جدید پولیسنگ نظام سے استفادہ کے لیے ایکسچینج پروگرامز نہایت مفید ہو سکتے ہیں، جبکہ دونوں وزرائے داخلہ نے وزارت داخلہ کے مابین کوآرڈینیشن بہتر بنانے کے لیے فوکل پرسن مقرر کرنے کا بھی فیصلہ کیا۔