پاکستان کا اعزاز، 58 سائنسدان دنیا کے ٹاپ 2 فیصد افراد کی بااثر محققین کی فہرست میں شامل

اسلام آباد: پاکستان نے عالمی سطح پر ایک اہم سائنسی اعزاز حاصل کر لیا ہے، جہاں 58 پاکستانی سائنسدان دنیا کے ٹاپ دو فیصد بااثر محققین کی فہرست میں شامل ہو گئے ہیں۔

یہ فہرست عالمی شہرت یافتہ اسٹین فورڈ یونیورسٹی کی جانب سے جاری کی گئی ہے، جس میں دنیا بھر کے ممتاز محققین کو ان کی سائنسی خدمات، تحقیقی اثرات اور حوالہ جات (Citations) کی بنیاد پر درجہ بندی دی جاتی ہے۔

فہرست میں شامل نمایاں پاکستانی سائنسدانوں میں پروفیسر جاوید اکرم، پروفیسر ڈاکٹر ذوالفقار احمد بھٹہ اور پروفیسر عبدالباسط شامل ہیں۔

صحت اور طبی تحقیق میں نمایاں کارکردگی

عالمی رینکنگ میں پاکستان کی بہتر پوزیشن کی بڑی وجہ صحت اور طبی تحقیق کے شعبے میں نمایاں پیش رفت قرار دی جا رہی ہے۔ پاکستانی محققین نے میڈیکل سائنس، پبلک ہیلتھ اور دیگر سائنسی شعبوں میں اہم تحقیقی کام انجام دیا ہے۔

ماہرین کے مطابق یہ کامیابی عالمی سطح پر پاکستان کے سائنسی وقار میں اضافے کا باعث بنے گی اور نوجوان محققین کیلئے حوصلہ افزائی کا سبب بنے گی۔