بھارت کیخلاف میچ کا بائیکاٹ، پاکستان فیصلے پر نظرثانی کرے: سری لنکا کی اپیل

سری لنکا کرکٹ نے آئی سی سی مینز ٹی ٹوئنٹی ورلڈ کپ 2026 میں بھارت کے خلاف میچ نہ کھیلنے کے پاکستان کے فیصلے پر نظرِ ثانی کی اپیل کر دی ہے۔

غیر ملکی خبر ایجنسی کے مطابق سری لنکا کرکٹ (ایس ایل سی) نے پاکستان کرکٹ بورڈ (پی سی بی) کو باقاعدہ خط لکھا ہے، جس میں کہا گیا ہے کہ 15 فروری کو کولمبو میں شیڈول پاک۔بھارت ہائی پروفائل میچ کی منسوخی سے سری لنکا کرکٹ کو بھاری مالی نقصان اٹھانا پڑ سکتا ہے۔

مالی اور سیاحتی نقصان کا خدشہ

سری لنکا کرکٹ کے بیان میں کہا گیا ہے کہ کسی بھی قسم کی عدم شرکت کے دور رس اثرات ہوں گے، جن میں نمایاں مالی خسارہ اور متوقع سیاحتی آمدن میں کمی شامل ہے۔ خط میں بتایا گیا کہ پاک۔بھارت میچ کے لیے ٹکٹس کی فروخت سمیت میزبانی کی تمام تیاریاں مکمل کی جا چکی ہیں۔

ایس ایل سی نے اس بات پر بھی زور دیا کہ مشکل وقت میں سری لنکا کرکٹ نے پاکستان کرکٹ بورڈ کا ساتھ دیا ہے، لہٰذا دونوں بورڈز کے دیرینہ تعلقات اور کرکٹ کے وسیع تر مفاد کو مدنظر رکھتے ہوئے فیصلے پر نظرِ ثانی کی جائے۔

ٹورنامنٹ کا آغاز 7 فروری سے

واضح رہے کہ آئی سی سی مینز ٹی ٹوئنٹی ورلڈ کپ 7 فروری 2026 سے بھارت اور سری لنکا میں مشترکہ طور پر شروع ہو رہا ہے۔ اطلاعات کے مطابق پاکستان نے اپنی ٹیم کو روایتی حریف بھارت کے خلاف میدان میں اتارنے سے روک دیا ہے، جس کے بعد صورتحال نے نیا رخ اختیار کر لیا ہے۔