گوگل کے اے آئی چیٹ بوٹ جیمنائی کے ماہانہ صارفین 75 کروڑ سے تجاوز کر گئے

گوگل کے آرٹی فیشل انٹیلی جنس (اے آئی) چیٹ بوٹ جیمنائی کے ماہانہ صارفین کی تعداد 75 کروڑ سے تجاوز کر گئی ہے۔ یہ انکشاف کمپنی کی جانب سے جاری کی گئی تازہ سہ ماہی آمدنی رپورٹ میں کیا گیا ہے۔

رپورٹ کے مطابق جیمنائی استعمال کرنے والے افراد کی تعداد میں تیزی سے اضافہ دیکھنے میں آیا ہے۔ گوگل نے 2025 کی تیسری سہ ماہی میں بتایا تھا کہ جیمنائی کے ماہانہ صارفین کی تعداد 65 کروڑ ہے، تاہم صرف تین ماہ کے دوران اس میں نمایاں اضافہ ہوا ہے۔

اعداد و شمار کے مطابق جیمنائی اس وقت میٹا کے اے آئی چیٹ بوٹ سے آگے ہے، جس کے ماہانہ صارفین کی تعداد 50 کروڑ کے قریب بتائی جاتی ہے۔ تاہم اس کے باوجود جیمنائی اپنے سب سے بڑے حریف چیٹ جی پی ٹی سے پیچھے ہے، جس کے ماہانہ صارفین کی تعداد 2025 کے اختتام تک 81 کروڑ رپورٹ کی گئی تھی۔

گوگل کی جانب سے یہ اعداد و شمار ایسے وقت میں جاری کیے گئے ہیں جب کچھ عرصہ قبل کمپنی نے جیمنائی 3 متعارف کرایا ہے، جو گوگل کا اب تک کا سب سے جدید اور ایڈوانسڈ اے آئی ماڈل ہے۔ کمپنی کے مطابق جیمنائی 3 انتہائی گہرائی میں جا کر پیچیدہ کام انجام دینے کی صلاحیت رکھتا ہے۔

گوگل کے چیف بزنس آفیسر فلپ شنڈلر کا کہنا ہے کہ کمپنی جیمنائی کے مفت صارفین اور سبسکرائبرز دونوں پر یکساں توجہ مرکوز کیے ہوئے ہے، جس کے مثبت اور حوصلہ افزا نتائج سامنے آ رہے ہیں۔