پاکستان اور سری لنکا کے درمیان کرکٹ میچز کا شیڈول تبدیل

اسلام آباد: پاکستان اور سری لنکا کے درمیان ایک روزہ سیریز کے بقیہ میچز کے شیڈول میں تبدیلی کر دی گئی ہے۔
چیئرمین پاکستان کرکٹ بورڈ (پی سی بی) محسن نقوی نے سماجی رابطے کی ویب سائٹ X (سابقہ ٹوئٹر) پر اپنے بیان میں کہا کہ “پاکستان اور سری لنکا کے درمیان بقیہ ایک روزہ میچز اب 14 اور 16 نومبر کو کھیلے جائیں گے۔”
انہوں نے مزید کہا کہ دونوں میچز راولپنڈی کرکٹ اسٹیڈیم میں ہی ہوں گے۔
محسن نقوی نے سری لنکن ٹیم کے دورہ پاکستان جاری رکھنے کے فیصلے پر شکریہ ادا کرتے ہوئے کہا کہ “ہم سری لنکن کرکٹ بورڈ اور ٹیم کے مشکور ہیں جنہوں نے دوستی، اعتماد اور کھیل کے جذبے کے تحت دورہ جاری رکھنے کا فیصلہ کیا۔”
واضح رہے کہ سری لنکن کرکٹ بورڈ نے گزشتہ روز تصدیق کی تھی کہ ٹیم اپنا دورۂ پاکستان شیڈول کے مطابق جاری رکھے گی۔ بورڈ نے کھلاڑیوں اور مینجمنٹ کو ہدایت دی ہے کہ وہ طے شدہ پروگرام کے مطابق سیریز مکمل کریں۔
دورہ پاکستان کے تسلسل پر شائقینِ کرکٹ اور پاکستانی حکام نے سری لنکن ٹیم کا شکریہ ادا کرتے ہوئے کہا ہے کہ دونوں ممالک کے درمیان تعلقات مزید مضبوط ہوں گے۔