شادیوں کے سیزن میں دلہنوں پر تنقید، ہانیہ عامر اور مایا علی کا ردعمل سامنے آ گیا

اداکارہ ہانیہ عامر اور مایا علی نے شادیوں کے سیزن کے دوران سوشل میڈیا پر دلہنوں کے لباس اور انداز پر غیر ضروری تنقید کے بڑھتے رجحان پر تشویش کا اظہار کیا ہے۔

ہانیہ عامر نے انسٹاگرام پر بیان میں کہا کہ فیشن کا تجزیہ اور تنقید صرف رن ویز، ریڈ کارپٹس اور کمرشل فیشن تک محدود ہونی چاہیے، جبکہ حقیقی دلہنوں کے شادی کے لمحات کو ریویو یا درجہ بندی کا موضوع نہیں بنایا جانا چاہیے۔ ان کے مطابق شادی کا دن ذاتی اور جذباتی ہوتا ہے، جسے تنقید کے بجائے احترام اور ہمدردی کے ساتھ دیکھا جانا چاہیے۔

اداکارہ مایا علی نے ہانیہ عامر کے موقف کی حمایت کرتے ہوئے ان کی پوسٹ کو دوبارہ شیئر کیا اور عوام سے اپیل کی کہ حقیقی دلہنوں پر غیر ضروری تنقید سے گریز کیا جائے۔ انہوں نے تمام دلہنوں کے لیے نیک تمناؤں کا بھی اظہار کیا۔

یہ بحث اس وقت شدت اختیار کر گئی جب حال ہی میں اداکارہ سبینہ سید کے شادی کے لباس پر سوشل میڈیا پر مختلف فیشن بلاگرز اور صارفین نے تنقیدی تبصرے کیے۔ بعض حلقوں نے دلہن کے لباس کو ایسے زیرِ بحث لایا جیسے وہ کسی عوامی فیشن ایونٹ کا حصہ ہو۔

شادیوں کے سیزن میں اس نوعیت کی تنقید ایک معمول بنتی جا رہی ہے، جس پر شوبز شخصیات اور صارفین کے درمیان اختلافِ رائے بھی دیکھا جا رہا ہے۔ کئی افراد کا کہنا ہے کہ ذاتی تقریبات کو عوامی تنقید سے الگ رکھا جانا چاہیے۔