وزیر اعلیٰ خیبر پختونخوا محمد سہیل آفریدی کی عالمی بینک کے صدر اجے بنگا سے ملاقات

اسلام آباد: وزیر اعلیٰ خیبر پختونخوا محمد سہیل آفریدی نے اسلام آباد میں عالمی بینک کے صدر اجے بنگا سے ملاقات کی، جس میں صحت، تعلیم و ہنر، معدنیات، توانائی اور کلائمیٹ رزیلینس کے شعبوں میں تعاون بڑھانے پر تبادلہ خیال کیا گیا۔

وزیر اعلیٰ سہیل آفریدی نے کہا کہ صوبائی حکومت عالمی بینک کے تعاون کو قدر کی نگاہ سے دیکھتی ہے اور صحت و تعلیم صوبے کی اولین ترجیحات ہیں۔ انہوں نے بتایا کہ صوبائی حکومت پرائمری ہیلتھ کیئر کے نظام کو مضبوط بنا رہی ہے اور خیبر پختونخوا میں ’’احساس ماں‘‘ پروگرام کا آغاز کیا جا رہا ہے، جس کے تحت ماں اور بچے کی پیدائش سے پہلے اور بعد کی مکمل دیکھ بھال فراہم کی جائے گی، اور بچے کی پیدائش پر تین ماہ اضافی معاونت دی جائے گی۔

وزیر اعلیٰ نے مزید کہا کہ صوبے کی سو فیصد آبادی کو یونیورسل ہیلتھ کوریج فراہم کی جا رہی ہے اور قدرتی آفات سے بچاؤ کے لیے کلائمیٹ رزیلینس میں سرمایہ کاری بڑھائی جا رہی ہے۔ معدنیات کے شعبے میں مقامی آبادی کے مفادات کو اولین ترجیح دی جا رہی ہے اور غذائی خود کفالت کے لیے جامع حکمت عملی کے تحت اقدامات کیے جا رہے ہیں۔

انہوں نے بتایا کہ جنوبی اضلاع میں بنجر زمینوں کو قابل کاشت بنانے کے لیے متعدد منصوبے زیر عمل ہیں۔ ملاقات میں مشیر خزانہ مزمل اسلم، چیف سیکرٹری شہاب علی شاہ اور دیگر متعلقہ حکام بھی موجود تھے۔