امریکا: ٹک ٹاک پر سینسرشپ کے باعث متبادل ایپس مقبول ہونے لگیں

امریکہ میں صدر ڈونلڈ ٹرمپ کے وفادار سرمایہ کاروں کی جانب سے ویڈیو شیئرنگ پلیٹ فارم ٹک ٹاک کے اکثریتی حصص خریدنے کے بعد پلیٹ فارم کی متبادل ایپس کی مقبولیت میں اضافہ ہونا شروع ہو گیا ہے۔

غیر ملکی خبررساں ادارے کے مطابق ٹک ٹاک پر ٹرمپ اور ان کی انتظامیہ سے متعلق مواد سینسر کرنے کے الزامات سامنے آنے کے بعد صارفین نے اسکائی لائٹ اور اپ اسکرولڈ نامی ایپس کو زیادہ ڈاؤن لوڈ کیا ہے۔

گزشتہ ہفتے ٹک ٹاک کے امریکی آپریشن کی ملکیت چینی کمپنی بائٹ ڈانس سے امریکی سرمایہ کاروں کے گروہ کو منتقل ہوئی، جس کی سربراہی صدر ٹرمپ کے ساتھی لیری ایلیسن کر رہے ہیں۔

نئی انتظامیہ کے اقدامات کے باعث، جس پر سینسر شپ کے الزامات عائد کیے جا رہے ہیں، ٹک ٹاک (جس کے امریکہ میں تقریباً 17 کروڑ صارفین ہیں) کے بائیکاٹ کے مطالبات سامنے آئے ہیں۔

مختصر دورانیے کی ویڈیو ایپ اپ اسکرولڈ، جو خود کو ٹک ٹاک کا سینسر فری متبادل قرار دیتی ہے، ایپل کے ایپ اسٹور میں ٹاپ 10 مفت ایپس کی فہرست میں پہنچ گئی ہے۔