وزیراعلیٰ پنجاب کی ہر ضلع میں سٹروک مینجمنٹ سنٹر بنانے کی منظوری

وزیراعلیٰ پنجاب مریم نواز شریف نے صوبے کے ہر ضلع میں سٹروک مینجمنٹ سنٹر قائم کرنے کی منظوری دے دی ہے۔ وزیراعلیٰ نے ہر ڈسٹرکٹ ہیڈکوارٹر ہسپتال میں نیورالوجسٹ اور پیڈز نیورالوجسٹ کی تعیناتی کا اصولی فیصلہ بھی کر لیا ہے۔

اجلاس میں بتایا گیا کہ ہر ضلع میں ایک ڈاکٹر اور ایک نرس کو فوری طور پر تین ماہ کی سٹروک مینجمنٹ ٹریننگ دی جائے گی۔ وزیراعلیٰ نے سٹروک کے مریضوں کے لیے فوری طور پر ٹیلی میڈیسن پراجیکٹ شروع کرنے کی ہدایت کی، جس کے تحت ضلعی ہسپتالوں کے ڈاکٹر فالج کے مریضوں کے فوری علاج کے لیے سپیشلسٹ اور کنسلٹنٹس سے رابطہ کر سکیں گے۔

مریم نواز شریف نے نرسز کے لیے خصوصی تربیتی پروگرام اور فالج کے علاج سے متعلق عوامی آگاہی مہم شروع کرنے کا بھی حکم دیا۔ انہوں نے کہا کہ فالج کے علاج میں گولڈن آورز کی انتہائی اہمیت ہے اور اس آگاہی مہم کی قیادت وہ خود کریں گی۔