دبئی پولیس کا مخصوص کیڑوں کی مدد سے موت کے وقت اور وجوہات کا تعین

دبئی پولیس نے جرائم کی تفتیش کے لیے ایک جدید اور غیر معمولی سائنسی طریقہ متعارف کرا دیا ہے، جس کے تحت کیڑوں کی مدد سے ایسی اموات کی تحقیقات کی جا رہی ہیں جن میں بظاہر کوئی سراغ موجود نہیں ہوتا۔

فرانزک ماہرین کے مطابق مخصوص کیڑے اور ان کی نشوونما کے مراحل اگر لاش پر پائے جائیں تو وہ موت کے وقت، حالات اور بعض اوقات وقوعہ کے مقام کے بارے میں اہم معلومات فراہم کرتے ہیں۔ اس سائنسی طریقۂ کار کی بدولت تفتیشی ادارے ایسے کیسز بھی حل کرنے میں کامیاب ہو رہے ہیں جو طویل عرصے تک معمہ بنے رہتے تھے۔

دبئی پولیس کا کہنا ہے کہ فرانزک تحقیق میں اس جدید طریقے کے استعمال سے شواہد زیادہ مضبوط ہوئے ہیں جبکہ تحقیقات میں شفافیت اور درستی میں بھی اضافہ ہوا ہے۔ یہ طریقہ دنیا کے جدید پولیس نظاموں میں استعمال کیا جا رہا ہے جسے دبئی پولیس نے مقامی حالات کے مطابق مؤثر انداز میں اپنایا ہے۔