سونے اور چاندی کی قیمتوں میں بڑا اضافہ، نرخ تاریخ کی نئی بلندیوں پر پہنچ گئے

عالمی اور مقامی مارکیٹوں میں سونے اور چاندی کی قیمتوں میں نمایاں اضافے کے باعث نرخ تاریخ کی نئی بلند ترین سطح پر پہنچ گئے ہیں۔

ایران میں قیادت کی تبدیلی کے لیے امریکا کی جانب سے ممکنہ فوجی کارروائی کے خدشات، امریکی فیڈرل ریزرو کی شرحِ سود میں مزید کمی کی بازگشت اور مجموعی جیو پولیٹیکل غیر یقینی صورتحال کے باعث عالمی سطح پر قیمتی دھاتوں کی مانگ میں اضافہ دیکھا جا رہا ہے، جس کا براہِ راست اثر مقامی مارکیٹ پر بھی پڑا ہے۔

بین الاقوامی بلین مارکیٹ میں فی اونس سونے کی قیمت میں 75 ڈالر کا بڑا اضافہ ریکارڈ کیا گیا، جس کے بعد سونے کی قیمت تاریخ کی بلند ترین سطح 4 ہزار 670 ڈالر فی اونس تک جا پہنچی۔

ماہرین کے مطابق عالمی سیاسی کشیدگی اور مالیاتی بے یقینی کے باعث سرمایہ کار محفوظ سرمایہ کاری کے طور پر سونے اور چاندی کی جانب تیزی سے رجوع کر رہے ہیں، جس کے نتیجے میں قیمتوں میں مسلسل اضافہ دیکھنے میں آ رہا ہے۔