انٹارکٹیکا کی برف کے نیچے کیا ہے؟ سائنس دانوں نے پتہ لگا لیا

سائنس دانوں نے انٹارکٹیکا کی برف کے نیچے چھپی زمین کے بارے میں ایسی حیران کن تفصیلات دریافت کر لی ہیں جن کی ماضی میں کوئی مثال نہیں ملتی۔ جدید نقشہ سازی اور سیٹلائٹ ٹیکنالوجی کی مدد سے پہلی بار اس برف پوش براعظم کی اصل جغرافیائی ساخت واضح ہو گئی ہے۔

ماہرین کے مطابق انٹارکٹیکا کی موٹی اور جمی ہوئی برف طویل عرصے سے اس کے نیچے موجود زمینی حقائق کو جاننے میں سب سے بڑی رکاوٹ رہی ہے۔ تاہم اب جدید ترین سائنسی طریقوں کے ذریعے اس مسئلے پر قابو پا لیا گیا ہے۔

تحقیق میں سیٹلائٹ ڈیٹا، گلیشیئرز کی حرکت (Glacier Dynamics) اور برف کے دباؤ سے متعلق طبیعیاتی اصولوں کو استعمال کیا گیا، جس کے نتیجے میں انٹارکٹیکا کی برف کے نیچے موجود زمین کا تفصیلی نقشہ تیار کیا گیا۔

تحقیقی نتائج کے مطابق برف کی موٹی تہوں کے نیچے ہزاروں پہاڑی چوٹیاں، گہری گھاٹیاں اور وسیع وادیاں دفن ہیں۔ ماہرین کا کہنا ہے کہ یہاں بڑے پہاڑی سلسلے موجود ہیں جن کی ساخت دنیا کے دیگر بڑے پہاڑی نظاموں سے مماثلت رکھتی ہے۔

نقشہ سازی سے یہ بھی معلوم ہوا کہ بعض مقامات پر انتہائی تنگ اور گہری گھاٹیاں پائی جاتی ہیں، جبکہ کچھ علاقوں میں وسیع و عریض وادیاں موجود ہیں جو ممکنہ طور پر ماضی میں دریاؤں یا برفانی نظاموں کا حصہ رہی ہوں گی۔

سائنس دانوں کے مطابق یہ دریافت نہ صرف زمین کی جغرافیائی تاریخ کو سمجھنے میں مدد دے گی بلکہ موسمیاتی تبدیلی، برف کے پگھلاؤ اور سمندری سطح میں اضافے سے متعلق تحقیق میں بھی کلیدی کردار ادا کرے گی۔