ناسا کا پرواز کے ڈیٹا کے تحفظ کیلئے فضا میں بلاک چین ٹیکنالوجی کا تجربہ

واشنگٹن: امریکی خلائی ادارہ ناسا ہوابازی کے شعبے میں سائبر سیکیورٹی کو مزید مضبوط بنانے اور فضائی نظام کے حساس ڈیٹا کو چھیڑ چھاڑ اور خلل سے محفوظ رکھنے کے لیے بلاک چین ٹیکنالوجی کی آزمائش کر رہا ہے۔

غیر ملکی میڈیا رپورٹس کے مطابق ناسا کے ایمز ریسرچ سینٹر میں حال ہی میں ایک تجربہ کیا گیا، جس میں ڈرونز کے ذریعے ڈی سینٹرلائزڈ ڈیٹا انفرا اسٹرکچر کی توثیق کی گئی۔ اس تجربے کا مقصد طیاروں اور گراؤنڈ کنٹرول کے درمیان مواصلاتی نظام کو زیادہ محفوظ اور قابل اعتماد بنانا ہے۔

رپورٹ میں بتایا گیا ہے کہ یہ اقدام ناسا کے ایئر ٹریفک مینجمنٹ اور سیفٹی پروگرام کا حصہ ہے، جو مستقبل میں فضائی نظام کو یکسر تبدیل کرنے کی صلاحیت رکھتا ہے۔

تجربے کے دوران ترمیم شدہ Alta-X ڈرون کو کیلیفورنیا کے سلیکون ویلی میں واقع ایمز ریسرچ سینٹر میں معمول کے حالات میں اڑایا گیا۔ ڈرون میں ایک خصوصی نظام نصب تھا جس میں جی پی ایس ماڈیول، ریڈیو ٹرانسمیٹر اور بلاک چین سے منسلک کمپیوٹر سسٹم شامل تھا۔

ناسا کے مطابق اس تجربے کے ذریعے محققین کو یہ جانچنے کا موقع ملا کہ بلاک چین پر مبنی فریم ورک حقیقی آپریشنل ماحول میں کس حد تک مؤثر کارکردگی دکھاتا ہے۔

بلاک چین ٹیکنالوجی روایتی ڈیٹا بیس کے برعکس ایک ڈی سینٹرلائزڈ لیجر کے طور پر کام کرتی ہے، جس میں معلومات متعدد نظاموں میں محفوظ ہوتی ہیں اور ہر تبدیلی کو ریکارڈ اور تصدیق کیا جاتا ہے۔ اس طریقہ کار سے یہ یقینی بنایا جاتا ہے کہ پرواز سے متعلق ڈیٹا سائبر دباؤ یا حملوں کے باوجود مستند، ناقابلِ تبدیلی اور شفاف رہے۔

رپورٹ کے مطابق یہ نظام ٹیلی میٹری، آپریٹر رجسٹریشن اور فلائٹ پلانز جیسے ہوابازی کے حساس ڈیٹا کی محفوظ اور حقیقی وقت میں ترسیل کو ممکن بناتا ہے، جبکہ صرف تصدیق شدہ اور قابل اعتماد صارفین کو ہی معلومات تک رسائی دی جاتی ہے۔

ماہرین کا کہنا ہے کہ اس نوعیت کا ڈی سینٹرلائزڈ انفرا اسٹرکچر مستقبل میں خودکار گاڑیوں، شہری فضائی نقل و حرکت اور بلند فضائی آپریشنز کی معاونت کے لیے بھی بنیادی کردار ادا کر سکتا ہے۔

ناسا کی رپورٹ کے مطابق تجربے کے دوران حقیقی سائبر حملوں کی نقل کرتے ہوئے متعدد ٹیسٹ کیے گئے، جن میں بلاک چین فریم ورک نے مضبوط اور مستحکم کارکردگی دکھائی اور پورے عمل کے دوران ڈیٹا مکمل طور پر محفوظ رہا۔