انٹارکٹیکا میں جمی برف کے نیچے چھپی دنیا کا خفیہ نقشہ منظر عام پر آ گیا

سائنسدانوں نے انٹارکٹیکا میں جمی ہوئی برف کے نیچے چھپی دنیا کا تفصیلی نقشہ تیار کر کے منظر عام پر لے آئے ہیں۔

یہ نیا نقشہ انٹارکٹیکا کی زمین میں موجود پہاڑوں، وادیوں اور میدانی علاقوں کو بے نقاب کرتا ہے اور موسمیاتی تبدیلیوں کے اثرات کو سمجھنے کے لیے اہم معلومات فراہم کرتا ہے۔

تحقیق میں محققین نے سیٹلائٹ ڈیٹا کو گلیشیئر کی نقل و حرکت سے متعلق موجود معلومات کے ساتھ ملا کر انٹارکٹیکا کی برف کے نیچے چھپی زمین کی شکل اور خصوصیات کا تخمینہ لگایا۔

نقشے کے ذریعے برف کے نیچے بلند و بالا پہاڑ، وادیاں اور دیگر زمین کی اہم خصوصیات سامنے آئی ہیں۔

تحقیق کے سربراہ اور ایڈنبرا یونیورسٹی کے گلیشیولوجسٹ، رابرٹ بنگھم، نے بتایا کہ برف کے بہاؤ کی حرکیات کو سمجھنے کے لیے بیڈراک کی درست نقشہ سازی نہایت ضروری ہے، کیونکہ یہ برف کے پگھل کر سمندر میں بہنے کی رفتار پر اثر انداز ہوتی ہے۔

انہوں نے مزید کہا کہ بیڈراک کے درست نقشے کی مدد سے برف کے بہاؤ اور اس کے سطح سمندر میں اضافے پر اثرات کو بہتر انداز میں سمجھا جا سکتا ہے، جو مستقبل کی موسمیاتی پیش گوئیوں کے لیے انتہائی اہمیت رکھتا ہے۔