مائیکرو سافٹ کے اے آئی شعبے کے سربراہ کی اس ٹیکنالوجی کے بارے میں حیران کن پیشگوئی

آرٹی فیشل انٹیلی جنس (AI) ٹیکنالوجی تیزی سے زندگی کے ہر شعبے میں اپنا اثر ڈال رہی ہے۔ دفاتر، صنعتی شعبے، روزمرہ زندگی اور دیگر متعدد امور میں اس کا استعمال بڑھ رہا ہے۔

مائیکرو سافٹ اے آئی کے چیف ایگزیکٹو مصطفیٰ سلیمان کے مطابق اگلے پانچ سال کے اندر ہر فرد کے پاس اپنا ذاتی AI ساتھی ہوگا، جو اس کے بارے میں تفصیلی معلومات رکھے گا اور زندگی کے اہم فیصلوں میں مدد فراہم کرے گا۔

مصطفیٰ سلیمان کا کہنا ہے کہ یہ AI ساتھی دیکھنے، سننے، ترجیح دینے اور صارف کے جذبات کو سمجھنے کی صلاحیت رکھیں گے، اور ایسا محسوس ہوگا جیسے یہ ہمیشہ ساتھ رہنے والا دوست ہو۔

انہوں نے مزید کہا کہ AI ساتھی انسان کے عزائم اور سیاق و سباق کو سمجھیں گے اور زندگی کے چیلنجز میں رہنمائی فراہم کریں گے۔

واضح رہے کہ مصطفیٰ سلیمان نے مائیکرو سافٹ سے قبل Pyi Chatbot تیار کرنے والی کمپنی کے ساتھ اس ٹیکنالوجی کو ایموشنل انٹیلی جنس سے لیس پرسنل AI کے طور پر متعارف کرایا تھا، جو بعد ازاں 2024 میں مائیکرو سافٹ کا حصہ بن گئی۔