ایلون مسک کی اے آئی کمپنی xAI کے خلاف مقدمہ، گروک پر ڈیپ فیک نازیبا تصاویر بنانے کا الزام

ایلون مسک کی مصنوعی ذہانت کمپنی xAI ایک سنگین قانونی تنازعے کی زد میں آ گئی ہے، جہاں ایشلی سینٹ کلیئر نے کمپنی کے چیٹ بوٹ گروک کے خلاف عدالت میں مقدمہ دائر کر دیا ہے۔

درخواست گزار کا الزام ہے کہ گروک نے ان کی جعلی مگر حقیقت سے قریب تر نازیبا اور جنسی نوعیت کی تصاویر تیار کر کے سوشل میڈیا پلیٹ فارم ایکس پر پھیلائیں، جو ڈیپ فیک مواد کے زمرے میں آتی ہیں۔

عدالتی دستاویزات کے مطابق یہ تصاویر بچوں اور بڑوں دونوں کی شکل میں بنائی گئیں، جن میں بعض مواد کو غیر قانونی قرار دیا گیا ہے۔ درخواست میں کہا گیا ہے کہ گروک متاثرین کو برہنہ اور جنسی استحصال کا نشانہ بنانے والا ٹول بن چکا ہے۔

ایشلی سینٹ کلیئر کے مطابق انہوں نے ان تصاویر کی شکایت ایکس انتظامیہ کو کی، جس پر ابتدائی طور پر یقین دہانی کرائی گئی کہ مزید ایسا مواد تیار نہیں ہوگا، تاہم بعد میں ان کا اکاؤنٹ ڈی مونیٹائز کر دیا گیا اور مزید نازیبا تصاویر سامنے آئیں۔

وکیل کیری گولڈبرگ کے مطابق یہ مقدمہ مصنوعی ذہانت کے غلط استعمال کو روکنے اور قانونی حدود کے تعین کے لیے ایک اہم کیس ثابت ہو سکتا ہے۔

یہ مقدمہ ایسے وقت میں سامنے آیا ہے جب ایشلی سینٹ کلیئر اور ایلون مسک کے درمیان اپنے بیٹے رومولس کی تحویل سے متعلق قانونی کارروائی بھی جاری ہے۔