ایسا روبوٹ جو انسانوں کے ہونٹوں کی طرح حرکت دیکر باتیں کرسکتا ہے

امریکا کی کولمبیا یونیورسٹی کے ماہرین نے روبوٹکس میں ایک انقلابی پیشرفت کرتے ہوئے ایسا روبوٹ چہرہ تیار کیا ہے جو انسانی ہونٹوں کی درست حرکت کر سکتا ہے۔

جرنل “سائنس روبوٹیکس” میں شائع تحقیق کے مطابق یہ روبوٹ مختلف زبانوں کے الفاظ ادا کر سکتا ہے اور آرٹی فیشل انٹیلی جنس (اے آئی) کی بدولت گانا بھی گا سکتا ہے۔ روبوٹ مشاہدے سے سیکھ کر اپنے ہونٹوں کی حرکت میں مہارت حاصل کرتا ہے، اور جیسے جیسے انسانوں سے بات چیت کرتا ہے، اس کی کارکردگی بہتر ہوتی جاتی ہے۔

ماہرین نے روبوٹ کے چہرے میں 26 چھوٹے موٹرز نصب کیے اور اسے انسانی ہونٹوں کی نقل کرنے کے لیے یوٹیوب ویڈیوز کے ذریعے تربیت دی۔ ہونٹوں کی حرکت کی پیچیدگی اور روبوٹ کے سخت چہرے کی لچک نہ ہونے جیسے چیلنجز پر قابو پانے کے بعد یہ روبوٹ حقیقی انسانی تاثرات کی نقل کرنے کے قابل بن گیا۔

تحقیق کے مطابق اے آئی ٹیکنالوجی کے امتزاج سے روبوٹ انسانوں کے ساتھ زیادہ فطری اور مؤثر رابطہ قائم کر سکے گا، جس سے مستقبل میں روبوٹکس اور انسانی تعامل کے میدان میں نئی راہیں کھلیں گی۔