مشہور گلوکار پر خاتون کے الزامات کے بعد 16 ملین ڈالر کا مقدمہ دائر

عالمی شہرت یافتہ گلوکار بیڈ بنی کے خلاف ایک خاتون کی آواز ان کی اجازت کے بغیر موسیقی میں استعمال کرنے پر 16 ملین ڈالر ہرجانے کا مقدمہ دائر کر دیا گیا ہے۔

غیر ملکی میڈیا رپورٹس کے مطابق 31 سالہ بیڈ بنی پر الزام ہے کہ انہوں نے اپنے مقبول گانے “Solo de Mí” (2018) اور حالیہ گانے “EoO” (2025) میں ایک خاتون کی وائس ریکارڈنگ بغیر اجازت استعمال کی۔

رولنگ اسٹون اور بِل بورڈ کے مطابق یہ مقدمہ 5 جنوری 2026 کو پورٹو ریکو میں بیڈ بنی، ان کے پروڈیوسر لا پاسیئنسیا (روبرٹو روسادو) اور میوزک لیبل رِماس انٹرٹینمنٹ کے خلاف درج کیا گیا۔

مقدمہ دائر کرنے والی خاتون ٹینالی وائی سیرانو رویرا کا مؤقف ہے کہ انہوں نے اپنی آواز کی ریکارڈنگ بطور ذاتی احسان بیڈ بنی کے پروڈیوسر کو فراہم کی تھی، جسے بعد ازاں تجارتی مقاصد کے لیے استعمال کر لیا گیا۔ ان کے مطابق یہ واقعہ 2018 میں پیش آیا، جب وہ اور پروڈیوسر ایک ہی تعلیمی ادارے میں زیرِ تعلیم تھے۔

ٹینالی سیرانو کا کہنا ہے کہ انہیں اس وائس ریکارڈنگ کے عوض کبھی کوئی معاوضہ نہیں دیا گیا، جبکہ ان کی اجازت کے بغیر آواز کا استعمال قانونی اور اخلاقی طور پر خلافِ ضابطہ ہے، جس پر انہوں نے 16 ملین ڈالر ہرجانے کا دعویٰ دائر کیا ہے۔

رپورٹس کے مطابق بیڈ بنی اور ان کا میوزک لیبل مئی 2026 میں عدالت میں الزامات کا باضابطہ جواب جمع کرائیں گے۔ واضح رہے کہ دونوں متنازع گانے ریلیز کے بعد غیر معمولی طور پر کامیاب رہے اور عالمی میوزک چارٹس میں نمایاں پوزیشنز حاصل کیں۔