صدر کے دستخط کے بغیر آرڈیننس کا اجرا، پیپلز پارٹی کا ایوان سے واک آؤٹ

اسلام آباد: پیپلز پارٹی نے صدر کے دستخط کے بغیر جاری کیے گئے آرڈیننس کے معاملے پر قومی اسمبلی سے واک آؤٹ کر دیا۔ پارٹی ذرائع کے مطابق چیئرمین بلاول بھٹو زرداری نے اس معاملے پر پارلیمانی پارٹی کا اجلاس طلب کر لیا ہے۔

ذرائع کے مطابق پارلیمانی پارٹی کا اجلاس کل دوپہر 2 بجے پارلیمنٹ ہاؤس میں ہوگا، جس میں وفاقی حکومت کے آئینی طریقہ کار پر تحفظات پر غور کیا جائے گا۔ ارکان کو اجلاس میں شرکت کی ہدایات جاری کر دی گئی ہیں۔

قومی اسمبلی کے اجلاس کے دوران پی پی کے ارکان نے واک آؤٹ کرتے ہوئے کہا کہ یہ ایوان قانون سازی کی بنیادی ذمہ داری رکھتا ہے، لیکن حکومت نے پہلی بار ایسا آرڈیننس نافذ کیا جس کی صدر نے توثیق نہیں کی۔ وزیر قانون اعظم نذیر تارڑ نے کہا کہ صدر کی توثیق کے بغیر آرڈیننس کو نوٹیفائی نہیں کیا جائے گا۔