پاک افغانستان سرحدی صورتحال پر برطانوی مؤقف زمینی حقائق کی عکاسی نہیں کرتا: دفتر خارجہ

اسلام آباد: ترجمان دفترِ خارجہ نے ایک حالیہ بیان میں کہا ہے کہ پاک افغان سرحد پر برطانوی موقف زمینی حقائق کی مکمل عکاسی نہیں کرتا اور یہ ایک غیر متوازن نقطہ نظر ہے۔ ترجمان کے مطابق، افغانستان کی جانب سے سرحد پار دہشت گردی اور دراندازی کی کوششیں بلا تعطل جاری ہیں، یہاں تک کہ مارچ میں پاکستان کے جنگ بندی اقدام کے باوجود افغان سرزمین سے حملوں کا سلسلہ نہیں رکا۔ افغان طالبان کی جانب سے کی جانے والی بلااشتعال فائرنگ اور دہشت گردانہ کارروائیوں کے نتیجے میں اب تک 52 پاکستانی شہری شہید اور 84 زخمی ہو چکے ہیں۔ پاکستان نے واضح کیا کہ افغانستان کی جانب سے شہری ہلاکتوں کے الزامات بے بنیاد ہیں اور عالمی برادری کو پاکستان کی قربانیوں کا ادراک کرنا چاہیے۔