رکاوٹوں کے باعث کام جاری رکھناممکن نہیں، گوادرمیں چینی کمپنی نے فیکٹری بند کردی،تمام ملازمین برطرف

گوادر فری زون میں قائم چین کی ہین جینگ ٹریڈ کمپنی نے فیکٹری بند کرنے کا اعلان کرتے ہوئے تمام ملازمین کوبرطرف کردیا۔

کمپنی کی جانب سے جاری کردہ اعلامیے میں کہاگیاہےکہ ہم  معذرت خواہ ہیں۔ ہم نے ہر ممکن کوشش کی۔لیکن غیر تجارتی عوامل اور آپریشنل رکاوٹوں کے باعث کام جاری رکھنا ممکن نہیں رہا۔

چینی کمپنی کے مطابق برآمدات کیلئے عالمی معیارات کی تکمیل کے باوجود برآمدات جمود کا شکار ہیں۔گزشتہ تین ماہ سے حکام سے رابطے میں رہنے کے باوجود کمپنی کو مالی نقصانات کا سامنا کرنا پڑا۔ ان تین ماہ کے دوران ملازمین کی تنخواہیں، جرمانے، بجلی کے بل اور کنٹینر ڈیمرج چارجز ادا کیے گئے۔

ہینگ جینگ ٹریڈکمپنی کے اعلامیے میں کہاگیاہے کہ پاکستان اور چین بہترین معاشی شراکت دار ہیں، گوادر سی پیک کا فلیگ شپ پراجیکٹ ہے۔ کمپنی نے  پاک چین دوستی کے جذبے کے ساتھ سرمایہ کاری کر رہی تھی۔ تاہم کاروبار کے لیے واضح اور قابل عمل پالیسی ماحول کی ضرورت ہے۔

کمپنی کے مطابق گوادر میں سرمایہ کاری کرنے سے قبل غیر یقینی صورتحال کا بغور جائزہ لینا ضروری ہے۔۔تمام ملازمین سے گہری معذرت کیونکہ کمپنی موجودہ حالات میں روزگار فراہم کرنے کے قابل نہیں۔