سعودی عرب کا بڑا فیصلہ؛ 15 سال سے کم عمر بچوں کے حج پر پابندی عائد

سعودی حکومت نے حج سیزن کے لیے نئے ضوابط جاری کرتے ہوئے پاکستان سمیت دنیا بھر سے 15 سال سے کم عمر عازمینِ حج پر پابندی عائد کر دی ہے۔ اس فیصلے کے حوالے سے سعودی حکام نے وزارتِ مذہبی امور پاکستان اور تمام پرائیویٹ حج آپریٹرز کو باضابطہ طور پر تحریری ہدایت نامہ بھی جاری کر دیا ہے۔ اس نئی پالیسی کا اطلاق تمام ممالک پر یکساں طور پر ہوگا اور اب 15 سال سے کم عمر بچے حج کے لیے سعودی عرب نہیں جا سکیں گے۔

کراچی: سعودی عرب کی جانب سے حج کے لیے عمر کی نئی حد نافذ کرنے کے فیصلے پر عملدرآمد شروع ہو گیا ہے۔ پاکستان ایئرپورٹ اتھارٹی (پی اے اے) نے ایک نیا ہدایت نامہ جاری کیا ہے، جس کے مطابق 3 مئی 2026 سے 15 سال سے کم عمر عازمین کو حج پروازوں میں سفر کرنے کی اجازت نہیں ہوگی۔ پی اے اے نے ملک بھر کے ایئرپورٹس کو ہدایت کی ہے کہ وہ ایسے کم عمر عازمین کو پروازوں میں سوار ہونے سے روکیں، کیونکہ سعودی حکام نے ان کے حج ویزے پہلے ہی منسوخ قرار دے دیے ہیں۔ تاہم، سعودی حکام کی جانب سے متاثرہ عازمین کو ان کی حج رقم کی مکمل واپسی کی یقین دہانی کرائی گئی ہے۔