اڈیالہ جیل: بشریٰ بی بی سے ملاقات کی درخواست مسترد، وکلا کا جیل حکام پر قانون شکنی کا الزام

اڈیالہ جیل راولپنڈی میں بشریٰ بی بی سے ملاقات کے لیے دی گئی درخواست پر تنازع سامنے آ گیا، جہاں وکلا کی جانب سے جمع کروائی گئی درخواست جیل حکام نے وصول کرنے سے انکار کر دیا۔

تفصیلات کے مطابق سلمان اکرم راجہ کی ہدایت پر چوہدری اویس یونس، فیصل ملک اور راجہ متین پر مشتمل وکلا کی ٹیم جیل پہنچی، جو بشریٰ بی بی کی بیٹی کی جانب سے دی گئی تحریری درخواست جمع کروانے آئی تھی۔

چوہدری اویس ایڈووکیٹ نے بتایا کہ وہ مبشرہ مانیکا کی والدہ سے ملاقات سے متعلق نمائندگی رپورٹ جمع کروانے آئے تھے، تاہم جیل انتظامیہ نے درخواست لینے سے انکار کر دیا۔

وکلا کا کہنا ہے کہ یہ اقدام نہ صرف غیر قانونی ہے بلکہ قیدیوں کے حقوق سے متعلق قواعد کی خلاف ورزی بھی ہے۔ انہوں نے اس صورتحال کو انسانی حقوق کے اصولوں کے منافی قرار دیا۔

وکلا نے مطالبہ کیا ہے کہ سپریٹنڈنٹ جیل فوری طور پر قانون کے مطابق عمل درآمد یقینی بنائیں۔ ان کا مزید کہنا تھا کہ درخواست بذریعہ ڈاک بھی ارسال کر دی گئی ہے۔