معرکۂ حق کی مناسبت سے مزارِ اقبال پر تقریب، مفکرِ پاکستان کو خراجِ عقیدت پیش

مزارِ اقبال پر معرکۂ حق کی مناسبت سے منعقدہ تقریب میں نامور قوال راحت فتح علی خان نے “لب پہ آتی ہے دعا” سمیت کلامِ اقبال پیش کر کے حاضرین پر وجد طاری کر دیا۔ تقریب میں مختلف جامعات کے وائس چانسلرز، ماہرینِ تعلیم اور طلباء و طالبات کی بڑی تعداد نے شرکت کی اور مزار پر پھولوں کی چادریں چڑھا کر عقیدت کا اظہار کیا۔ مقررین نے علامہ اقبالؒ کے فلسفۂ خودی اور دو قومی نظریے کو اجاگر کرتے ہوئے معرکۂ حق کی کامیابی کو اقبال کے خوابوں کی تعبیر قرار دیا۔ اس موقع پر افواجِ پاکستان کی خدمات کو زبردست خراجِ تحسین پیش کیا گیا اور تقریب کا اختتام ملکی سلامتی و استحکام کی دعاؤں کے ساتھ ہوا۔