میوزک انڈسٹری میں لیجنڈز گلوکاروں کو مسلسل نظر انداز کیا جا رہا ہے: حمیرا چنا

معروف پاکستانی پلے بیک گلوکارہ حمیرا چنا نے میوزک انڈسٹری میں اقربا پروری اور جانبداری کے بڑھتے ہوئے رجحان پر کھل کر تنقید کرتے ہوئے کہا ہے کہ مواقع چند مخصوص فنکاروں تک محدود ہو چکے ہیں جبکہ تجربہ کار گلوکاروں کو مسلسل نظرانداز کیا جا رہا ہے۔

ایک حالیہ پوڈکاسٹ میں گفتگو کرتے ہوئے ان کا کہنا تھا کہ فیورٹ ازم اس حد تک عام ہو چکا ہے کہ بار بار انہی چند ناموں کے ساتھ کام کیا جاتا ہے اور دیگر باصلاحیت فنکار پس منظر میں چلے جاتے ہیں۔ حمیرا چنا نے اعتراف کیا کہ وہ خود بھی اس رویے کا سامنا کر چکی ہیں۔

انہوں نے کہا کہ یہ صورتحال افسوسناک ضرور ہے مگر حقیقت یہی ہے اور ضروری ہے کہ انڈسٹری اصل صلاحیت کو ترجیح دے اور تمام فنکاروں کو ساتھ لے کر چلے۔