رجب بٹ کی شادی خطرے میں، سوشل میڈیا پر اسکرین شاٹس کے ساتھ پیغام جاری

تنازعات کی زد میں رہنے والے مشہور پاکستانی یوٹیوبر رجب بٹ ایک بار پھر خبروں کی زینت بن گئے ہیں۔ ذاتی زندگی، قانونی مسائل اور بے باک بیانات کے باعث اکثر زیرِ بحث رہنے والے رجب بٹ حال ہی میں وکلا سے مبینہ جھگڑے کے بعد بھی سرخیوں میں آئے تھے۔

سوشل میڈیا پر شدید تنقید کے باوجود رجب بٹ اپنے مداحوں کی بھرپور حمایت رکھتے ہیں۔ یوٹیوب پر ان کے سبسکرائبرز کی تعداد 83 لاکھ سے زائد جبکہ انسٹاگرام پر ان کے 29 لاکھ فالوورز ہیں۔

حالیہ دنوں میں قانونی مشکلات کے ساتھ ساتھ ان کی ازدواجی زندگی بھی مبینہ طور پر تناؤ کا شکار ہے، کیونکہ ان کے سالے عون محمد کی جانب سے سوشل میڈیا پر ان کے خلاف بیانات سامنے آ رہے ہیں۔

اس صورتحال پر اب رجب بٹ نے خاموشی توڑتے ہوئے انسٹاگرام پر ایک سخت پیغام جاری کیا ہے۔ انہوں نے اپنی اہلیہ اور سالے کو آخری وارننگ دیتے ہوئے کہا کہ ان کے پاس مزید آڈیو ریکارڈنگز اور اسکرین شاٹس موجود ہیں اور وہ اب اس معاملے کو مزید برداشت نہیں کریں گے۔

واضح رہے کہ اس معاملے پر فریقِ مخالف کی جانب سے تاحال کوئی باضابطہ ردِعمل سامنے نہیں آیا۔