چینی سائنسدانوں کی بڑی پیش رفت، سوڈیم,سلفر بیٹری لیتھیم کا متبادل بننے کے قریب

چینی انجینئرز نے سوڈیم اور سلفر پر مبنی ایک نئی قسم کی بیٹری تیار کر لی ہے جو لیتھیم بیٹریوں کا سستا اور زیادہ محفوظ متبادل ثابت ہو سکتی ہے۔

دنیا بھر میں برقی آلات اور الیکٹرک گاڑیوں کی بڑھتی ہوئی تعداد کے باعث لیتھیم کو بطور بیٹری مٹیریل وسیع پیمانے پر استعمال کیا جا رہا ہے، تاہم لیتھیم بیٹریوں کے زیادہ گرم ہونے، حفاظتی خدشات اور لیتھیم کے محدود و مہنگے حصول کی وجہ سے متبادل ٹیکنالوجی کی تلاش جاری ہے۔

سوڈیم اور سلفر بیٹریوں پر ماضی میں کی جانے والی کوششیں کئی عملی رکاوٹوں کا شکار رہیں۔ ان میں سب سے بڑا مسئلہ اینوڈ میں سوڈیم دھات کی بہت زیادہ مقدار کا استعمال تھا، جو نہ صرف لاگت اور حفاظتی خطرات میں اضافہ کرتا تھا بلکہ توانائی اور پاور ڈینسٹی کو بھی متاثر کرتا تھا۔ اس کے علاوہ، ابتدائی ڈیزائنز نارمل درجۂ حرارت پر مؤثر انداز میں بجلی پیدا کرنے میں ناکام رہے۔

جرنل نیچر میں شائع ہونے والی تحقیق کے مطابق محققین نے کیمیائی ردِعمل میں بنیادی تبدیلیاں کر کے ایک ہائی وولٹیج، اینوڈ فری سوڈیم-سلفر بیٹری تیار کی ہے جو کمرۂ درجۂ حرارت پر مؤثر انداز میں کام کرتی ہے۔

سائنسدانوں کا کہنا ہے کہ نیا بیٹری ڈیزائن 3.6 وولٹ کا ڈسچارج وولٹیج فراہم کرتا ہے، جو پرانے سوڈیم-سلفر ماڈلز کے تقریباً 1.6 وولٹ کے مقابلے میں نمایاں طور پر زیادہ ہے۔ یہ پیش رفت نہ صرف بیٹری کی کارکردگی میں بہتری لاتی ہے بلکہ اسے محفوظ، کم لاگت اور بڑے پیمانے پر استعمال کے قابل بھی بناتی ہے۔

ماہرین کے مطابق یہ نئی ٹیکنالوجی مستقبل میں الیکٹرک گاڑیوں، توانائی ذخیرہ کرنے کے نظام اور دیگر برقی آلات میں انقلاب برپا کر سکتی ہے۔