معروف بھارتی صحافی پاکستان کی مہمان نوازی اور محبت کے معترف

بھارت اور پاکستان کے پنجاب خطے کے درمیان محبت، ثقافتی قربت اور باہمی احترام کی ایک طویل اور مضبوط تاریخ رہی ہے، جس کا اظہار آئے روز دونوں ممالک کی معروف شخصیات اپنے تجربات کے ذریعے کرتی نظر آتی ہیں۔

حال ہی میں نامور بھارتی مصنفہ اور سینئر صحافی شیبا اسلم فہمی نے اپنے پوڈکاسٹ ’کنٹو پرنتو ود شیبا‘ میں پاکستان کے بارے میں نہایت مثبت اور دل کو چھو لینے والے خیالات کا اظہار کیا۔ ان کا کہنا تھا کہ “آج تک ایسا کوئی بھارتی نہیں ملا جو پاکستان سے ہو کر آیا ہو اور پھر اس کے خلاف بات کرے۔”

شیبا اسلم فہمی کے مطابق پاکستان کا دورہ کرنے والے بھارتی شہری ہمیشہ وہاں کے لوگوں کی مہمان نوازی، محبت اور خلوص کے قصے سناتے ہیں۔ انہوں نے بتایا کہ کرکٹرز اور مشہور شخصیات بھی متعدد بار یہ ذکر کر چکی ہیں کہ پاکستانی دکاندار کئی مواقع پر ان سے پیسے لینے سے انکار کر دیتے ہیں۔

اسی پوڈکاسٹ میں ان کے ساتھی، ایوارڈ یافتہ بھارتی صحافی شِو اندَر سنگھ نے بھی 2024 میں پاکستان کے دورے کا دلچسپ تجربہ شیئر کیا۔ ان کا کہنا تھا کہ پاکستانی دوستوں نے انہیں اتنے زیادہ تحائف دیے کہ انہیں اضافی سوٹ کیس خریدنا پڑا، جو دکاندار نے خوشی سے مفت دے دیا۔

شِو اندَر سنگھ نے بتایا کہ ایک دکاندار نے ان سے کپڑوں کی قیمت لینے سے انکار کیا، انہیں ملک شیک پلایا اور ڈیڑھ گھنٹے تک اپنی دادی کی کہانیاں سنائیں کہ کس طرح وہ لدھیانہ سے لاہور پہنچیں۔

ان کے مطابق پاکستانی عوام بھارتی فلموں، اداکاروں اور پنجابی ثقافت سے گہری محبت رکھتے ہیں، اور یہی مشترکہ تہذیبی و ثقافتی رشتہ دونوں جانب کے پنجاب کو آج بھی مضبوطی سے جوڑے ہوئے ہے۔