حلب میں شامی فوج اور ایس ڈی ایف کے درمیان جھڑپیں، شہری علاقوں پر گولہ باری، 9 جاں بحق

شام کے شہر حلب میں شامی سرکاری افواج اور شامی ڈیموکریٹک فورسز (ایس ڈی ایف) کے درمیان کشیدگی شدت اختیار کر گئی ہے، جہاں دونوں جانب سے شہری علاقوں کو نشانہ بنانے کے الزامات کے دوران 9 شہری جاں بحق اور 55 زخمی ہو گئے۔

عرب میڈیا کے مطابق شامی فوج نے شیخ مقصود اور اشرفیہ کے علاقوں میں ایس ڈی ایف کے ٹھکانوں پر توپ خانے سے حملے شروع کیے ہیں۔ ایک شامی فوجی ذریعے نے الجزیرہ کو بتایا کہ یہ کارروائیاں ایس ڈی ایف کی جانب سے کیے گئے حملوں کے جواب میں کی جا رہی ہیں۔

دوسری جانب شامی سرکاری خبر رساں ایجنسی کا کہنا ہے کہ ایس ڈی ایف نے حلب کے المیدان علاقے کو توپ خانے اور مارٹر گولوں سے نشانہ بنایا، جس سے شہری آبادی کو نقصان پہنچا۔ شام کی وزارتِ صحت کے مطابق حملوں میں 9 شہری جاں بحق اور 55 زخمی ہوئے، جن میں خواتین اور بچے بھی شامل ہیں، جبکہ بعض زخمیوں کی حالت تشویشناک بتائی جا رہی ہے۔

تاہم ایس ڈی ایف کے میڈیا آفس نے حکومتی مؤقف کو مسترد کرتے ہوئے الزام عائد کیا ہے کہ شامی افواج مسلسل تیسرے روز بھی اشرفیہ کے رہائشی علاقوں پر توپ خانے اور ٹینکوں سے گولہ باری کر رہی ہیں، جس سے شہریوں کی جانیں خطرے میں ہیں۔