وزیراعظم کا 120 ارب روپے سولر اسکینڈل پر ایکشن، 2 اعلیٰ سطح کی کمیٹیاں قائم

وزیراعظم نے سولر پینلز کی درآمد میں مبینہ 120 ارب روپے کی زائد مالیت ظاہر کرنے کے اسکینڈل پر فوری ایکشن لیتے ہوئے دو اعلیٰ سطح کمیٹیاں قائم کردی ہیں۔

حکومتی ذرائع کے مطابق ایک کمیٹی نگرانی کے امور سرانجام دے گی جبکہ دوسری کمیٹی تحقیقات اور قانونی کارروائی کی ذمہ دار ہوگی۔

نگرانی کمیٹی کی سربراہی سیکرٹری اسٹیبلشمنٹ نبیل اعوان کریں گے جبکہ تحقیقات و قانونی پیروی کمیٹی کی سربراہی ڈائریکٹر جنرل کسٹمز انٹیلیجنس رباب سکندر کے سپرد کی گئی ہے۔

کمیٹیوں میں اسٹیٹ بینک، وفاقی تحقیقاتی ادارے اور دیگر متعلقہ اداروں کے نمائندوں کو بھی شامل کیا گیا ہے۔

ذرائع کے مطابق اندرونی آڈٹ رپورٹ میں سولر پینلز کی کلیئرنس کے دوران سنگین بے ضابطگیوں اور قواعد کی خلاف ورزیوں کی نشاندہی کی گئی۔

رپورٹ کے مطابق صرف دس فیصد درآمدی کھیپ کے آڈٹ میں 120 ارب روپے کی مبینہ زائد مالیت ظاہر کرنے کا معاملہ سامنے آیا۔