زمبابوے ویمن کرکٹ ٹیم سیریز کے بعد وطن واپس روانہ

کراچی: زمبابوے ویمن کرکٹ ٹیم پاکستان میں ون ڈے اور ٹی ٹوئنٹی سیریز مکمل کرنے کے بعد آج وطن واپس روانہ ہو گئی۔

ٹیم کی روانگی کراچی سے شام 5 بج کر 50 منٹ پر ہوئی۔ سیریز کے دوران مہمان ٹیم نے بھرپور مقابلہ کیا جبکہ کھلاڑیوں نے پاکستان میں اپنے قیام کو خوشگوار قرار دیا۔

زمبابوے ویمن ٹیم کی کپتان نومویلو سبانڈا نے کہا کہ پاکستان میں ان کے لیے ہر چیز بہت اچھی رہی اور یہاں کھیل کر انہیں خوشی ہوئی، وہ مستقبل میں دوبارہ پاکستان آ کر کھیلنا چاہیں گی۔

انہوں نے مزید کہا کہ سیریز کے دوران تمام کھلاڑیوں نے کھیل سے بھرپور لطف اٹھایا اور ماحول کو بہت مثبت پایا۔

کپتان کے مطابق پاکستان میں انہیں بے حد محبت اور پذیرائی ملی جبکہ یہاں کے کھانوں سے بھی انہوں نے خوب لطف اٹھایا۔

سیریز کے دوران سیکیورٹی انتظامات اور مہمان نوازی کو بھی زمبابوے ٹیم نے سراہا۔

مہمان ٹیم نے پاکستان کرکٹ بورڈ اور شائقینِ کرکٹ کا شکریہ ادا کرتے ہوئے اپنے دورہ پاکستان کو یادگار قرار دیا۔