برطانوی گلوکار زین ملک ہسپتال میں زیرِ علاج

برطانوی نژاد عالمی شہرت یافتہ گلوکار زین ملک کے مداحوں کے لیے تشویشناک خبر سامنے آئی ہے کہ وہ ان دنوں اپنی بگڑتی ہوئی صحت کے باعث ہسپتال میں زیرِ علاج ہیں۔ 33 سالہ گلوکار، جو اپنی نئی البم “کوناکول” (Konakul) کی ریلیز کے بعد اس کی تشہیر میں مصروف تھے، اب ایک ماہرِ امراضِ قلب (Cardiologist) کی نگرانی میں ہیں، جس کے باعث ان کی تمام پیشہ ورانہ سرگرمیاں فی الحال معطل کر دی گئی ہیں۔

زین ملک نے 17 اپریل کو ہسپتال کے بستر سے اپنی ایک تصویر سوشل میڈیا پر شیئر کر کے مداحوں کو اپنی صحت کے بارے میں آگاہ کیا تھا۔ اگرچہ انہوں نے ایک ہفتے بعد بہتری کی اطلاع دی ہے، تاہم ڈاکٹروں نے انہیں مکمل آرام اور سفری مصروفیات محدود کرنے کا مشورہ دیا ہے، جس کی وجہ سے جمی فالن کے مشہور پروگرام سمیت کئی اہم ملاقاتیں ملتوی کر دی گئی ہیں۔