جوا پروموشن کیس، یوٹیوبراقرا کنول اورعروب جتوئی کی عبوری ضمانتوں میں توسیع

لاہور کی سیشن عدالت نے آن لائن جوا ایپ کی تشہیر (پرموشن) کے مقدمے میں معروف یوٹیوبرز اقرا کنول، ان کے شوہر اریب اور سعد الرحمان عرف ‘ڈکی بھائی’ کی اہلیہ عروب جتوئی کی عبوری ضمانتوں میں توسیع کر دی ہے۔ ایڈیشنل سیشن جج ذوالفقار احمد نعیم نے کیس کی سماعت کی، جس کے دوران اقرا کنول اور اریب اپنے وکیل سلیم چوہدری ایڈووکیٹ کے ہمراہ عدالت میں پیش ہوئے۔ عدالت نے دونوں کی عبوری ضمانتوں میں 23 اپریل تک توسیع کا حکم دیا۔ اسی نوعیت کے ایک دوسرے مقدمے میں عروب جتوئی نے بھی عدالت میں اپنی حاضری لگوائی۔ سماعت کے دوران وفاقی تحقیقاتی ادارے (FIA) کے سائبر کرائم ونگ (این سی سی آئی اے) نے تفتیش مکمل کرنے کے لیے مزید مہلت طلب کی، جسے عدالت نے منظور کرتے ہوئے تمام ملزمان کی ضمانتوں میں توسیع کر دی۔ واضح رہے کہ ان یوٹیوبرز پر آن لائن جوا ایپس کی تشہیر کے ذریعے قانون کی خلاف ورزی کا الزام ہے جس پر ان کے خلاف مقدمات درج ہیں۔