نیویارک کا نیا میئر کون ہوگا؟ آج پولنگ، زہران ممدانی سب سے مقبول امیدوار قرار

امریکی شہر نیویارک میں آج میئر کے انتخاب کے لیے پولنگ ہوگی، جس میں تین امیدواروں کے درمیان سخت مقابلہ متوقع ہے۔ تازہ ترین پولز کے مطابق ڈیموکریٹ امیدوار زہران ممدانی سب سے مقبول امیدوار کے طور پر سامنے آئے ہیں۔

غیر ملکی میڈیا رپورٹس کے مطابق تارکینِ وطن اور نوجوان ووٹرز کی بڑی تعداد زہران ممدانی کی حمایت کر رہی ہے۔ وہ جنوبی ایشیا سے تعلق رکھنے والے پہلے مسلم نوجوان امیدوار ہیں جو نیویارک کے میئر کے عہدے کے لیے میدان میں ہیں۔تازہ ترین سروے کے مطابق زہران ممدانی کو اپنے قریب ترین حریف اینڈریو کومو پر 14 فیصد سے زائد برتری حاصل ہے۔ فلسطینیوں کے حق میں آواز بلند کرنے کے باعث وہ امریکی مسلمانوں کے پسندیدہ امیدوار بن چکے ہیں۔اپنی آخری انتخابی ریلی سے خطاب میں زہران ممدانی نے ورکنگ کلاس طبقے کو ریلیف دینے کا وعدہ کیا اور امریکی صدر پر تنقید کرتے ہوئے کہا کہ “ٹرمپ نے اشیا سستی کرنے کا نعرہ لگایا مگر وعدہ پورا نہ کیا۔” ان کا کہنا تھا کہ “دھمکیاں دینے والوں کو شکست دینے کا بہترین طریقہ ان کا ڈٹ کر مقابلہ کرنا ہے۔”دوسری جانب سابق امریکی صدر ڈونلڈ ٹرمپ نے زہران ممدانی کو کبھی سوشلسٹ تو کبھی کمیونسٹ خیالات کا حامل قرار دیا ہے۔ ٹرمپ نے خبردار کیا کہ اگر ممدانی انتخاب جیت گئے تو نیویارک کے لیے وفاقی فنڈز روکنے پر غور کیا جا سکتا ہے