ویرات کوہلی نے سچن ٹنڈولکر کا ایک اور ریکارڈ توڑ دیا

بھارت کے اسٹار بیٹر ویرات کوہلی نے ایک اور شاندار سنگِ میل عبور کرتے ہوئے انٹرنیشنل کرکٹ میں تیز ترین 28 ہزار رنز بنانے والے بیٹر بننے کا ریکارڈ اپنے نام کر لیا، جو پہلے بھارتی لیجنڈ سچن ٹنڈولکر کے پاس تھا۔

کوہلی نے یہ کارنامہ نیوزی لینڈ کے خلاف ہوم ون ڈے سیریز کے پہلے میچ میں سر انجام دیا، جہاں انہوں نے شاندار 93 رنز کی اننگز کھیلی۔ ویرات کوہلی نے 624 انٹرنیشنل اننگز میں یہ سنگِ میل عبور کیا، جبکہ سچن ٹنڈولکر نے 28 ہزار رنز مکمل کرنے کے لیے 644 اننگز کھیلیں۔

پہلے ون ڈے میں بھارت نے نیوزی لینڈ کو 4 وکٹوں سے شکست دی۔ نیوزی لینڈ نے مقررہ 50 اوورز میں 8 وکٹوں کے نقصان پر 300 رنز بنائے، جس میں ڈیرل مچل نے 84 رنز کی اننگز کھیلی۔ جواب میں بھارت نے ویرات کوہلی اور شبمن گل کی نصف سنچریوں کی بدولت ہدف 49 اوورز میں حاصل کر لیا اور 3 میچز کی سیریز میں 1-0 کی برتری حاصل کی۔