ویتنام تباہ کن سیلاب کی لپیٹ میں، 55 ہلاکتیں اور لاکھوں متاثر

وسطی ویتنام شدید بارشوں اور تباہ کن سیلاب کی زد میں آگیا ہے، جہاں ہلاکتوں کی تعداد بڑھ کر 55 تک پہنچ گئی جبکہ لاکھوں افراد متاثر ہوئے ہیں۔
ڈیزاسٹر مینجمنٹ ایجنسی کے مطابق طوفانی بارشوں، سیلاب اور لینڈ سلائیڈنگ کے باعث 13 افراد تاحال لاپتہ ہیں۔ وسطی ویتنام کے متعدد علاقوں میں گزشتہ ہفتے کے دوران بارش 1,900 ملی میٹر سے بھی تجاوز کر گئی، جو معمول سے کئی گنا زیادہ ہے۔

سب سے زیادہ تباہی ڈاک لک صوبے میں ریکارڈ کی گئی جہاں 27 افراد جان سے گئے، جب کہ کھان ہوا صوبے میں 14 ہلاکتیں رپورٹ ہوئیں۔ سرکاری تخمینوں کے مطابق سیلاب نے ملک کی معیشت کو تقریباً 8.98 ٹریلین ڈونگ (445 ملین ڈالر) کا نقصان پہنچایا ہے۔

رپورٹس کے مطابق 2 لاکھ 35 ہزار سے زائد مکانات سیلابی پانی میں ڈوب گئے جبکہ 80 ہزار ایکڑ سے زیادہ رقبے پر کاشت کی گئی فصلیں مکمل طور پر متاثر ہوئیں۔ کافی کی فصلوں کا بڑا بیلٹ اور سیاحتی ساحلی مقامات بھی اس قدرتی آفت کی لپیٹ میں آگئے ہیں۔

حکام کا کہنا ہے کہ امدادی کارروائیاں تیز کردی گئی ہیں، تاہم سیلابی صورتحال کے پیشِ نظر ہلاکتوں اور نقصانات میں مزید اضافے کا خدشہ موجود ہے۔