عظمیٰ بخاری کا پی ٹی آئی مارچ ملتوی ہونے پر طنزیہ تبصرہ، مزاحیہ پوسٹر شیئر

وزیرِ اطلاعات پنجاب عظمیٰ بخاری نے پاکستان تحریکِ انصاف (پی ٹی آئی) کی جانب سے اسلام آباد کی جانب ممکنہ مارچ کے التوا کی خبروں پر شدید طنزیہ اور مزاحیہ انداز میں تبصرہ کرتے ہوئے سوشل میڈیا پر تین طنزیہ پوسٹرز شیئر کر دیے ہیں۔ ان پوسٹرز کے ذریعے پنجاب حکومت کی ترجمان نے پی ٹی آئی کے بار بار مارچ کی تاریخیں تبدیل کرنے اور احتجاجی سیاست کے التوا کو آڑے ہاتھوں لیا۔

عظمیٰ بخاری کی جانب سے جاری کردہ پہلے پوسٹر میں لکھا تھا، ’’انتشار مارچ ملتوی، اسلام آباد نے سکھ کا سانس لیا‘‘ جس کے نیچے جواباً تحریر تھا، ’’اور مارچ نے اگلی تاریخ تک سکھ کا سانس لیا۔‘‘ دوسرے پوسٹر میں اسلام آباد اور پی ٹی آئی قیادت کے درمیان ایک فرضی مکالمہ پیش کرتے ہوئے دکھایا گیا کہ اسلام آباد کے پوچھنے پر جواب ملتا ہے ’’ابھی نہیں آرہے‘‘، جس پر اسلام آباد کہتا ہے ’’اچھا، میں بھی آرام کر لیتا ہوں۔‘‘ جبکہ تیسرے میم گرافک پوسٹر میں پی ٹی آئی رہنما سہیل آفریدی کو افسردہ حالت میں دکھاتے ہوئے آزادی کا نعرہ لگانے پر کارکنوں کا مزاحیہ ردعمل ’’تو رین دے بھائی‘‘ شامل کیا گیا ہے۔ عظمیٰ بخاری نے ان پوسٹرز کے ذریعے پی ٹی آئی کے احتجاجی بیانیے کے ناکام ہونے کا دعویٰ کیا ہے۔