بلوچستان میں سکیورٹی فورسز کے آپریشنز: 8 دہشتگرد ہلاک، میجر اور حوالدار شہید

بلوچستان کے مختلف حساس علاقوں میں سکیورٹی فورسز کے کامیاب انٹیلی جنس بیسڈ آپریشنز کے دوران بھارتی حمایت یافتہ ’’فتنہ الہندوستان‘‘ سے تعلق رکھنے والے 8 دہشت گردوں کو ہلاک کر دیا گیا، جن میں ایک خودکش حملہ آور بھی شامل ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق دہشت گردوں کے ساتھ شدید فائرنگ کے تبادلے اور بزدلانہ حملے کے نتیجے میں مادروطن کا دفاع کرتے ہوئے پاک فوج کے میجر عمر منہاس ناصر اور حوالدار محمد عدنان خان نے بہادری سے لڑتے ہوئے جامِ شہادت نوش کیا۔

ترجمان پاک فوج کا کہنا تھا کہ سکیورٹی فورسز نے دہشت گردوں کی موجودگی کی خفیہ اطلاعات پر بلوچستان کے علاقوں کولپور، کردگاپ اور نوشکی کے گردونواح میں مربوط انٹیلی جنس بیسڈ آپریشنز کیے۔

آئی ایس پی آر کے مطابق اسی سلسلے میں 13 اور 14 نومبر کی درمیانی شب کولپور کے علاقے میں کی گئی ایک فیصلہ کن کارروائی کے دوران 8 دہشت گردوں کو جہنم واصل کر دیا گیا، جبکہ ہلاک ہونے والے دہشت گردوں کے ٹھکانوں اور قبضے سے بھاری مقدار میں جدید اسلحے اور گولہ بارود کا بڑا ذخیرہ بھی برآمد کر لیا گیا۔ سکیورٹی فورسز کا علاقے میں کلیئرنس اور سرچ آپریشن جاری ہے تاکہ کسی بھی ممکنہ خطرے کا مکمل خاتمہ کیا جا سکے۔