امریکا نے ایران کی آبنائے ہرمز کو بند کرنے کی دھمکی ناقابل قبول قرار دیدی

اقوامِ متحدہ کی سلامتی کونسل کے ایک ہنگامی اجلاس میں امریکا نے ایران کو سخت لہجے میں خبردار کیا ہے کہ بین الاقوامی تیل کی ترسیل کے لیے اہم ترین سمندری گزرگاہ ‘آبنائے ہرمز’ کو بند کرنے کی دھمکی کسی صورت قبول نہیں کی جائے گی اور نہ ہی اسے کوئی دفاعی اقدام قرار دیا جا سکتا ہے۔

اقوامِ متحدہ میں تعینات امریکی مندوب مائیک والٹز نے اجلاس کے دوران اپنے خطاب میں کہا کہ ہم ایران پر واضح کر دینا چاہتے ہیں کہ بین الاقوامی آبی راستوں کو بند کرنا یا ان کی بندش کی دھمکیاں دینا ناقابلِ قبول ہے، اور ایران کے اس طرزِ عمل کو کسی بھی صورت ‘دفاعِ نفس’ (Self-defense) نہیں سمجھا جا سکتا۔

سلامتی کونسل کا یہ ہنگامی اجلاس خلیجی ملک بحرین کی خصوصی درخواست پر بلایا گیا تھا، جس نے ایران پر خطے میں بار بار جارحیت کرنے کے سنگین الزامات عائد کیے تھے۔ واضح رہے کہ آبنائے ہرمز عالمی مارکیٹ میں تیل کی سپلائی کے لیے ایک انتہائی حساس اور اہم ترین بحری راستہ ہے، اور اس کی ممکنہ بندش کے خدشات نے پوری دنیا میں معاشی اور سفارتی سطح پر شدید تشویش پیدا کر دی ہے۔