سہ فریقی معاہدہ خطے میں جاری تنازعات کو ختم کرنے میں مدد دیگا: امریکا

امریکی محکمہ خارجہ کے ترجمان ٹومی پگٹ نے کہا ہے کہ لبنان، اسرائیل اور امریکا کے درمیان طے پانے والا سہ فریقی معاہدہ ایک واضح اور مستحکم راستہ فراہم کرتا ہے، جو خطے میں جاری طویل تنازعات کے تسلسل کو ختم کرنے میں اہم ثابت ہو سکتا ہے۔ میڈیا آؤٹ لیٹ ‘الجزیرہ’ سے خصوصی گفتگو کرتے ہوئے ٹومی پگٹ نے بتایا کہ یہ معاہدہ دراصل لامحدود تنازع کے چکر کو مستقل طور پر ختم کرنے کی ایک سنجیدہ کوشش ہے۔ اس معاہدے کے تحت ایک طرف لبنان کی حکومت کی خودمختاری کو بحال کیا جا رہا ہے، تو دوسری طرف اسرائیل کی سلامتی کو بھی مکمل طور پر یقینی بنایا جا رہا ہے۔

ترجمان نے مزید کہا کہ امریکا کا یہ مسلسل عزم ہے کہ لبنانی حکومت کی صلاحیت اور اس کی ادارہ جاتی طاقت کو مزید مضبوط بنایا جائے۔ انہوں نے بنیادی طریقہ کار کی وضاحت کرتے ہوئے بتایا کہ اس عمل کے تحت ابتدائی طور پر خطے میں ایسے مخصوص ‘پائلٹ زونز’ قائم کیے جا رہے ہیں، جہاں لبنانی حکومت مرحلہ وار اپنی خودمختاری کو دوبارہ قائم کرنا شروع کرے گی۔