امریکی صدر ٹرمپ نے بھارت کو ٹیرف بڑھانے کی دھمکی دے دی

امریکی صدر ڈونلڈ ٹرمپ نے روسی تیل کی خریداری کے معاملے پر تعاون نہ کرنے کی صورت میں بھارت پر اضافی ٹیرف عائد کرنے کی دھمکی دے دی ہے۔

غیر ملکی خبر رساں ادارے کے مطابق صدر ٹرمپ کا کہنا ہے کہ واشنگٹن روسی تیل کے معاملے پر نئی دہلی کے مؤقف کا سنجیدگی سے جائزہ لے رہا ہے، اور اگر بھارت نے اس حوالے سے تعاون نہ کیا تو اس پر ٹیرف بڑھانے پر غور کیا جا سکتا ہے۔

امریکی صدر کا یہ بیان ایسے وقت میں سامنے آیا ہے جب امریکا اور بھارت کے درمیان تجارتی مذاکرات جاری ہیں۔ اس سے قبل صدر ٹرمپ یہ دعویٰ بھی کر چکے ہیں کہ بھارتی وزیرِ اعظم نریندر مودی نے انہیں یقین دہانی کرائی تھی کہ بھارت روسی تیل کی خریداری بند کر دے گا۔

تاہم صدر ٹرمپ کے اس دعوے پر تاحال بھارت کی جانب سے کوئی باضابطہ تصدیق یا تردید سامنے نہیں آئی۔