امریکی مسلح افواج کے سربراہ کا صدر ٹرمپ کو ایران جنگ سے نکلنے کا مشورہ

امریکا کے چیئرمین جوائنٹ چیفس آف اسٹاف جنرل ڈین کین نے صدر ڈونلڈ ٹرمپ کو ایران جنگ سے نکلنے کی تجویز پیش کر دی ہے۔ امریکی ٹی وی کی رپورٹ کے مطابق جنرل کین ایران جنگ سے نکلنے کا راستہ تلاش کر رہے ہیں کیونکہ ان کا ماننا ہے کہ جنگ بڑھانے کے فوجی آپشنز کے الٹے نتائج نکل سکتے ہیں اور تنہا فضائی طاقت کے بل بوتے پر یہ معرکہ نہیں جیتا جا سکتا۔ جنرل کین نے اس حوالے سے سی آئی اے ڈائریکٹر جان ریٹکلیف، وزیرِ خارجہ مارکو روبیو اور نائب صدر جے ڈی وینس کے سامنے بھی اپنی تشویش ظاہر کی ہے۔ رپورٹ کے مطابق جہاں صدر ٹرمپ زمینی افواج بھیجنے کے بجائے صرف فضائی حملوں کے ذریعے ایران کو ڈیل پر مجبور کرنا چاہتے ہیں، وہاں جنرل کین اور دیگر دفاعی ماہرین کا خیال ہے کہ یہ حکمتِ عملی ناکام ہو جائے گی اور ایران میں پلوں و توانائی کی تنصیبات پر حملوں سے عوام کی حمایت ملنے کے بجائے امریکہ مخالف جذبات بڑھیں گے۔ تاہم امریکی سینٹرل کمانڈ اس آپریشن کی حمایت میں ہے جبکہ اسرائیل بھی اس تنازع کو مزید بڑھانے کا خواہا ہے۔