سعودی عرب نے ایسٹ ویسٹ آئل پائپ لائن دوبارہ فعال کردی

سعودی عرب نے حوثیوں کے ڈرون حملوں کے باعث عارضی طور پر بند کی گئی اپنی اہم ‘ایسٹ ویسٹ آئل پائپ لائن’ (East-West Oil Pipeline) کو دوبارہ فعال کر دیا ہے۔ عالمی خبر رساں ادارے ‘رائٹرز’ کے مطابق، پائپ لائن کے دوبارہ شروع ہونے سے بحیرۂ احمر کی اہم بندرگاہ ‘ینبع’ سے خام تیل کی برآمدات کی بحالی بھی شروع ہو گئی ہے۔ واضح رہے کہ سعودی عرب نے 13 ستمبر کو حوثی باغیوں کی جانب سے کیے گئے ڈرون حملوں کے بعد سیکیورٹی اور نقصانات کا جائزہ لینے کے لیے اس پائپ لائن کو بند کر دیا تھا اور ینبع بندرگاہ سے تیل کی لوڈنگ کا عمل روک دیا گیا تھا۔

سعودی عرب اس سترہ سو کلومیٹر طویل پائپ لائن کے ذریعے روزانہ تقریباً 40 لاکھ بیرل خام تیل مشرق سے بحیرۂ احمر کی بندرگاہ ینبع منتقل کرتا ہے۔ پائپ لائن کی کامیابی سے بحالی اور سپلائی میں بہتری کی اطلاعات منظرِ عام پر آتے ہی عالمی منڈیوں میں خام تیل کی قیمتوں میں نمایاں کمی دیکھنے میں آئی ہے، جہاں برینٹ کروڈ کی قیمت میں واضح گراوٹ ریکارڈ کی گئی ہے۔ عالمی تجارتی ماہرین کے مطابق پائپ لائن کی اس بحالی سے عالمی سطح پر توانائی کی معطل ہوتی سپلائی کا خطرہ کم ہوا ہے اور مارکیٹ میں مثبت اثرات دیکھنے کو مل رہے ہیں۔