بیرسٹر گوہر کی راجہ ناصر عباس سے ملاقات: 27 ستمبر لانگ مارچ اور گرفتاریوں کے خلاف مشترکہ لائحہ عمل پر تبادلہ خیال

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے سینیٹ میں اپوزیشن چیمبر کے اندر قائد حزبِ اختلاف سینیٹ اور مجلس وحدت مسلمین کے سربراہ علامہ راجہ ناصر عباس جعفری سے ایک اہم ملاقات کی۔ ملاقات کے موقع پر پی ٹی آئی کے ترجمان حسین احمد یوسفزئی بھی موجود تھے۔ اس اہم اجلاس کے دوران ملک کی مجموعی سیاسی صورتحال، تحریک تحفظ آئینِ پاکستان کے بینر تلے اپوزیشن جماعتوں کے باہمی تعاون، آئندہ کے سیاسی لائحہ عمل اور بالخصوص پشاور میں ہونے والے پارلیمانی پارٹی کے اہم اجلاس کے حوالے سے تفصیلی مشاورت کی گئی۔

ملاقات کے دوران دونوں رہنماؤں نے علیمہ خان، عظمیٰ خان اور نورین نیازی کی گرفتاریوں کے ساتھ ساتھ ملک بھر میں اپوزیشن کارکنان کے خلاف کیے جانے والے کریک ڈاؤن کی شدید الفاظ میں مذمت کی اور اسے جمہوری اقدار و آئین کی کھلی خلاف ورزی قرار دیتے ہوئے تمام سیاسی اسیران کی فوری رہائی کا مطالبہ کیا۔ رہنماؤں نے 27 ستمبر کے مجوزہ پرامن لانگ مارچ کی تیاریوں، تحرک اور حتمی حکمتِ عملی پر تفصیلی گفتگو کی اور اس بات پر کامل اتفاق کیا کہ حکومتی اقدامات کا مقابلہ کرنے اور آئین کی بالادستی کے لیے اپوزیشن جماعتوں کے مابین باہمی رابطوں کو مزید مؤثر اور منظم بنایا جائے گا۔