ایران کے ٹھکانوں کو نشانہ بنایا، اب مشرق وسطیٰ میں غنڈہ گردی نہیں کر سکتا: ٹرمپ

امریکی صدر ڈونلڈ ٹرمپ نے اقوام متحدہ کی جنرل اسمبلی کے افتتاحی اجلاس سے خطاب کرتے ہوئے دعویٰ کیا ہے کہ امریکہ ایک بار پھر تاریخ میں پہلے سے زیادہ طاقتور اور معاشی طور پر مستحکم ملک بن چکا ہے اور امریکی شہریوں کا مستقبل مکمل محفوظ ہے۔ اپنے خطاب کے دوران انہوں نے سرحدی سیکیورٹی اور معاشی پیش رفت کا ذکر کرتے ہوئے کہا کہ غیر قانونی تارکینِ وطن کی آمد اب تقریباً صفر ہو چکی ہے۔ ایران کے حوالے سے سخت موقف اپناتے ہوئے ٹرمپ نے کہا کہ مشرقِ وسطیٰ میں ایران کی غنڈہ گردی اب ختم ہو چکی ہے اور اسے کسی صورت ایٹمی ہتھیار حاصل کرنے نہیں دیے جائیں گے۔ انہوں نے ‘آپریشن مڈ نائٹ ہیمر’ کا تذکرہ کرتے ہوئے دعویٰ کیا کہ اس ملٹری آپریشن کے ذریعے ایران کی ایٹمی صلاحیتوں کو تباہ کیا گیا، تاہم وہ جلد ایک بڑا فیصلہ کرنے والے ہیں کہ آیا ایران کے ساتھ معاہدہ کیا جائے یا اسے مزید تباہ کیا جائے۔

اپنے خطاب کے دوران صدر ڈونلڈ ٹرمپ نے دنیا بھر میں 8 جنگیں رکوانے کا کریڈٹ لیتے ہوئے ایک بار پھر پاک بھارت تنازع اور وزیراعظم پاکستان شہباز شریف کا خصوصاً ذکر کیا۔ ٹرمپ نے وزیراعظم شہباز شریف کو ایک ‘عظیم رہنما’ اور ‘بہترین شخصیت’ قرار دیتے ہوئے کہا کہ شہباز شریف نے اعتراف کیا تھا کہ امریکی اقدامات سے کروڑوں لوگوں کی زندگیاں بچیں۔ اس کے علاوہ امریکی صدر نے روس یوکرین جنگ کے جلد خاتمے کا امکان ظاہر کیا، گرین لینڈ میں کسی بھی دشمن کی فوجی موجودگی کی سخت مخالفت کرتے ہوئے نئے معاہدے کا اعلان کیا، اور کیوبا کو ایک ناکام ریاست قرار دیا—جس کے ردِعمل میں کیوبا کے وفد نے ٹرمپ کی تقریر کے دوران اجلاس سے واک آؤٹ کیا۔