فیلڈ مارشل عاصم منیر سے فرانسیسی سیکرٹری جنرل برائے دفاع و قومی سلامتی کی ملاقات

پاکستان فوج کے شعبہ تعلقاتِ عامہ (آئی ایس پی آر) کے مطابق فرانس کے سیکرٹری جنرل برائے دفاع و قومی سلامتی نیکولس روشے فرانس کے سفیر کے ہمراہ جنرل ہیڈ کوارٹرز (جی ایچ کیو) راولپنڈی پہنچے، جہاں انہوں نے فیلڈ مارشل سید عاصم منیر سے اہم ملاقات کی۔ ملاقات کے دوران دونوں رہنماؤں کے مابین باہمی دلچسپی کے تمام امور، علاقائی سلامتی کی صورتحال اور دفاع و سیکیورٹی کے شعبوں میں دوطرفہ تعاون کو مزید وسعت دینے پر تفصیلی تبادلہ خیال کیا گیا۔

آئی ایس پی آر کے مطابق ملاقات میں فیلڈ مارشل سید عاصم منیر نے فرانس کے ساتھ دوطرفہ تعلقات کو مضبوط بنانے اور دفاعی و سیکیورٹی تعاون کو اعلیٰ سطح پر لے جانے کے لیے پاکستان کے پختہ عزم کا اعادہ کیا۔ اس موقع پر فرانسیسی سیکرٹری جنرل مسٹر نیکولس روشے نے خطے میں امن و استحکام کے فروغ اور دہشت گردی کے خلاف پاکستان کی مسلسل کوششوں کا اعتراف کیا۔ انہوں نے باہمی دلچسپی کے متعدد شعبوں میں دوطرفہ تعاون کو مزید گہرا کرنے کے حوالے سے فرانس کی مکمل دلچسپی کا اعادہ بھی کیا۔