اسرائیلی حکومت ٹرمپ کے غزہ منصوبے میں رکاوٹیں ڈال رہی ہے: اردوان

ترک صدر رجب طیب اردوان نے اقوام متحدہ کی جنرل اسمبلی کے اجلاس سے خطاب کرتے ہوئے کہا ہے کہ اسرائیلی حکومت امریکی صدر ڈونلڈ ٹرمپ کے پیش کردہ غزہ منصوبے کی راہ میں مسلسل رکاوٹیں ڈال رہی ہے۔ انہوں نے اقوام متحدہ کو شدید تنقید کا نشانہ بناتے ہوئے کہا کہ عالمی ادارہ دنیا میں امن قائم رکھنے کی اپنی بنیادی ذمہ داری پوری کرنے میں ناکام رہا ہے، اس لیے خطے کے مسائل کے حل کے لیے علاقائی سطح پر عملی اقدامات کی ضرورت ہے۔ اس سلسلے میں ترک صدر نے اعلان کیا کہ پاکستان اور سعودی عرب کے ساتھ دفاعی اتحاد ‘علاقائی ملکیت’ کے اصول پر قائم کیا گیا ہے، جس کا مقصد ترکیہ، پاکستان اور سعودی عرب کے مابین سیکیورٹی و یکجہتی کو مزید مضبوط بنانا ہے۔

ترک صدر نے اپنے خطاب میں آبنائے ہرمز میں بحری آمدورفت کی آزادی برقرار رکھنے اور خطے میں سیکیورٹی کے لیے سفارکاری جاری رکھنے پر زور دیا۔ انہوں نے 1967 کی سرحدوں کی بنیاد پر اور مشرقی یروشلم (القدس) کو دارالحکومت بناتے ہوئے ایک آزاد فلسطینی ریاست کے فوری قیام کا مطالبہ کیا، جبکہ غزہ کی جلد از جلد تعمیرِ نو کے لیے اسرائیل پر عالمی دباؤ بڑھانے اور ایک سال قبل شرم الشیخ معاہدے پر عملدرآمد کی اپیل کی۔ اردوان نے واضح کیا کہ فلسطینی ریاست کی آزادی اور خودمختاری کو دبانے کی تمام کوششیں ناکام ہوں گی۔ ترکیہ کے صدر طیب اردوان کے اس دوٹوک خطاب کے دوران اسرائیلی وفد جنرل اسمبلی ہال سے واک آؤٹ کر گیا۔