ایرانی دھمکی کے باعث ٹرمپ کا ترکیہ سے برطانیہ تک خفیہ فوجی پرواز میں سفر

امریکی صدر ڈونلڈ ٹرمپ نے ایرانی خطرات اور سیکیورٹی خدشات کے پیشِ نظر ترکیہ سے برطانیہ تک انتہائی خفیہ فوجی پرواز کے ذریعے سفر کیا ہے۔ امریکی اخبار ‘واشنگٹن پوسٹ’ کی رپورٹ کے مطابق امریکی صدر کو تحفظ فراہم کرنے کے لیے ایک غیر معمولی اور انتہائی سنسنی خیز آپریشن ترتیب دیا گیا تاکہ سفر کی تفصیلات مکمل طور پر راز میں رہیں۔

رپورٹ کے مطابق وائٹ ہاؤس اور سیکیورٹی حکام کی جانب سے ڈونلڈ ٹرمپ کو ان کے روایتی صدارتی طیارے ‘ایئر فورس ون’ میں سوار ہونے کی تجویز دی گئی تھی، تاہم حملے یا خطرے سے بچنے کے لیے حکمتِ عملی کے تحت ‘ایئر فورس ون’ کو بطور ‘ڈیکائے’ (دھوکہ دینے والے طیارے) کے طور پر خالی استعمال کیا گیا۔

ڈونلڈ ٹرمپ کو ایئرپورٹ پر خفیہ طور پر ایک کیٹرنگ ٹرک میں سوار کر کے بالواسطہ راستے سے دوسرے ملٹری ایئرکرافٹ C-32A تک منتقل کیا گیا جہاں سے انہوں نے برطانیہ کے لیے پرواز کی۔ سیکیورٹی خطرات کی نوعیت کے پیشِ نظر صدر کے اس پورے سفر کو انتہائی خفیہ رکھا گیا، جبکہ امریکی وزارتِ دفاع (پینٹاگون) نے اس خفیہ پرواز کے حوالے سے تبصرے کی درخواست کا فی الحال کوئی جواب نہیں دیا ہے۔