صدر ٹرمپ نے ول شارف کو نیا اسسٹنٹ ٹو دی پریذیڈنٹ اور وائٹ ہاؤس کونسل مقرر کردیا

امریکی صدر ڈونلڈ ٹرمپ نے وائٹ ہاؤس کے موجودہ اسٹاف سیکرٹری ول شارف کو اہم ترین عہدے پر فائز کرتے ہوئے انہیں نیا اسسٹنٹ ٹو دی پریذیڈنٹ اور وائٹ ہاؤس کونسل مقرر کرنے کا اعلان کیا ہے۔ عالمی میڈیا رپورٹس کے مطابق ول شارف یکم ستمبر سے اپنی نئی ذمہ داریاں باقاعدہ طور پر سنبھالیں گے۔

امریکی صدر نے اپنے سوشل میڈیا پلیٹ فارم “ٹروتھ سوشل” پر جاری بیان میں ول شارف کی کارکردگی کو سراہتے ہوئے کہا کہ انہوں نے بطور اسٹاف سیکرٹری اور نیشنل کیپیٹل پلاننگ کمیشن کے چیئرمین شاندار خدمات انجام دی ہیں۔ ڈونلڈ ٹرمپ نے ان کے پیشہ ورانہ پس منظر کا ذکر کرتے ہوئے بتایا کہ ول شارف سابق وفاقی پراسیکیوٹر رہ چکے ہیں، نجی شعبے میں بطور وکیل کام کیا ہے اور دو وفاقی اپیل عدالتوں کے ججوں کے ساتھ بطور کلرک بھی خدمات انجام دے چکے ہیں۔

امریکی میڈیا کے مطابق ول شارف نے 40 کروڑ ڈالر کے وائٹ ہاؤس بال روم منصوبے کی منظوری میں کلیدی کردار ادا کیا تھا، جسے حال ہی میں واشنگٹن ڈی سی کی وفاقی اپیل عدالت نے غیر قانونی قرار دیا ہے اور اب یہ معاملہ امریکی سپریم کورٹ میں جانے کا امکان ہے۔